Presidenti i Federatës së Futbollit të Kosovës, Agim Ademi, ka vizituar legjendën e futbollit kosovar dhe gjilanas, Shemsedin Abazi, i cili po trajtohet në spital. Gjatë vizitës, Ademi ka biseduar me Abazin për karrierën e tij të pasur në futboll dhe për sfidat shëndetësore dhe ekonomike që ai po përballet aktualisht. Abazi njihet si një nga sulmuesit më të spikatur të futbollit kosovar në vitet ’70 dhe ’80, duke lënë gjurmë të rëndësishme në klubet e Gjilanit dhe në përfaqësimin e Kosovës. Federata e Futbollit e Kosovës shpreh respekt dhe angazhim për të mbështetur legjendat e sportit, duke u zotuar të qëndrojë pranë Abazit në këtë periudhë të vështirë.