Ministri i Rinisë dhe Sportit, Blerim Gashani, ka zhvilluar një takim me presidentin e Lojërave Mesdhetare Prishtina 2030, Julian Pace Bonello, dhe sekretarin e përgjithshëm të ICMG-së, Iakovos Filippousis, për të koordinuar përgatitjet për organizimin e këtij eventi të rëndësishëm. Gjatë takimit u diskutua progresi i deritanishëm, projektet infrastrukturore dhe rëndësia strategjike e Lojërave Mesdhetare për Kosovën, jo vetëm në aspektin sportiv, por edhe për promovimin ndërkombëtar të vendit. Ministri Gashani theksoi përkushtimin institucional për realizimin e suksesshëm të këtij projekti madhor, duke siguruar që trashëgimia e Lojërave të ndikojë pozitivisht në zhvillimin e sportit, rinisë dhe infrastrukturës në të gjitha rajonet e Kosovës. Ai e përshkroi Prishtinën 2030 si një dëshmi të vizionit, bashkëpunimit dhe ambicies së Kosovës për të konsoliduar pozicionin e saj në skenën ndërkombëtare sportive.