KB Sigal Prishtina ka dhënë fund serisë prej pesë humbjeve radhazi duke mposhtur rivalin lokal KB Borën me rezultat 77:72 në një ndeshje shumë të luftuar të javës së 23-të të Superligës së Kosovës në basketboll. Takimi u zhvillua në palestrën “1 Tetori” dhe u vendos vetëm në aksionet e fundit, ku Prishtina tregoi më shumë saktësi për të siguruar dy pikët e rëndësishme. Deondre Burns ishte më i dalluari te Prishtina me 27 pikë, gjashtë asistime dhe katër kërcime, ndërsa Altin Morina dhe Adrio Bailey kontribuan gjithashtu me pikë dhe kërcime të rëndësishme. Te Borën u veçuan Shaquan Jules dhe Jetmir Zeqiri, megjithëse kjo nuk mjaftoi për të ndalur humbjen, ndërsa pas kësaj fitoreje Prishtina ngjitet në vendin e gjashtë në tabelë me 32 pikë, duke kaluar KB Vëllaznimin, ndërsa Bora mbetet në vendin e tretë me 35 pikë.