Prishtina do të jetë për herë të tretë radhazi nikoqire e kualifikimeve për FIBA 3×3 Euro Cup, një ngjarje ndërkombëtare që do të mbahet më 13-14 qershor në sheshin “Zahir Pajaziti”. Federata e Basketbollit të Kosovës ka përfunduar përgatitjet dhe pritet inspektimi final i fushës 3×3 në amfiteatrin e sheshit, ndërsa ekipet dhe zyrtarët e FIBA-s kanë filluar të mbërrijnë në kryeqytet. Në këtë turne do të marrin pjesë 12 shtete, me ekipe të meshkujve dhe femrave, ndër të cilët Kosova do të paraqesë lojtarët e saj më të mirë, duke përfshirë Adhurim Aliaj dhe Agnesa Rrahmani. Me mbështetjen e publikut vendas, Kosova synon rezultate pozitive dhe fitimin e biletës për në FIBA 3×3 Europe Cup që do të zhvillohet në Antwerp të Belgjikës.