Presidenti i FIFA-s, Gianni Infantino, ka prezantuar një projekt të ri financiar për Kupën e Botës, i cili parashikon shitjen e aksioneve te investitorë privatë dhe një rol të tij si komisioner në këtë model. Ai e përshkroi këtë nismë si një mundësi dhe jo një detyrim, duke theksuar se synon të përshpejtojë zhvillimin e futbollit global dhe të ndihmojë federatat që kanë më shumë nevojë për mbështetje financiare. Megjithatë, projekti është përballur me kritika të ashpra nga UEFA, federata të mëdha si ato të Anglisë dhe Francës, si dhe nga ish-presidenti Sepp Blatter, të cilët e konsiderojnë këtë model si një kërcënim për strukturat tradicionale të futbollit dhe për transparencën e menaxhimit të Kupës së Botës. Sipas një zbulimi të gazetës britanike The Times, federatave u është dhënë një afat prej vetëm 53 ditësh për të votuar pro ose kundër projektit, me premtimin e një financimi prej 40 milionë dollarësh në rast miratimi, dhe vetëm 10 milionë dollarë në rast refuzimi, çka është interpretuar si një formë presioni dhe korrupsioni për të siguruar mbështetje për planin e Infantinos.