Paris Saint-Germain ka vendosur të shpërblejë mbi 700 punëtorë të klubit me një bonus prej 5,140 euro secilit për triumfin historik në Ligën e Kampionëve sezonin 2024/25, ku mposhti Interin në finale. Shpërblimi është ndarë në dy këste, me pagesën e parë prej 4,500 euro dhe pjesën tjetër prej 640 euro, si një falënderim për angazhimin e të gjithë stafit administrativ dhe operativ, jo vetëm të ekipit të futbollit. Drejtori i përgjithshëm i PSG-së, Victoriano Melero, bëri të ditur këtë vendim, duke theksuar se suksesi në fushë dhe rritja komerciale kanë ndihmuar klubin të arrijë një buxhet rekord prej 837 milionë eurosh. Nga ky buxhet, rreth 4 milionë euro janë ndarë për shpërblimin e punëtorëve, duke konfirmuar pozicionin e PSG-së si një nga klubet më të forta financiarisht në Evropë.