Sulmuesi i Kombëtares së Kosovës, Vedat Muriqi, është shumë pranë rikthimit te Fenerbahçe gjatë afatit kalimtar veror, pasi klubi turk ka arritur marrëveshje me Mallorcan për transferimin e tij. Shuma e transferimit pritet të jetë rreth 15 milionë euro, të cilat Fenerbahçe do t’i paguajë në këste gjatë tre viteve të ardhshme, përfshirë edhe një klauzolë që garanton Mallorcas 10% të vlerës së një shitjeje të ardhshme. Muriqi ka arritur marrëveshje personale me klubin stambollit dhe pritet të udhëtojë së shpejti drejt Stambollit për t’u nënshtruar kontrolleve mjekësore dhe për të finalizuar kontratën e re. Rikthimi i tij konsiderohet një nga prioritetet e drejtuesve të rinj të Fenerbahçes dhe pritet të përshëndetet me entuziazëm nga tifozët, të cilët e kujtojnë kontributin e madh të sulmuesit gjatë periudhës së tij të parë në klub.