Ernest Muçi ka lënë pas dëmtimin në pjesën e sipërme të muskujve të përparmë të kofshës dhe është rikthyer në stërvitje me skuadrën e Trabzonsporit, vetëm pak ditë pasi u raportua se do mungonte për rreth dy javë. Ai mori pjesë në seancën e fundit përpara ndeshjes me Ferencvaroshin në Ligën e Europës, megjithëse nuk është ende i gatshëm për të luajtur dhe trajneri nuk dëshiron të rrezikojë me shëndetin e tij. Rikthimi i Muçit është një lajm i mirë edhe për Kombëtaren shqiptare, pasi tani ekziston mundësia që ai të jetë në dispozicion për ndeshjet e Ligës së Kombeve, ndryshe nga parashikimet fillestare që e kishin jashtë për disa javë. Për momentin, fokusi mbetet rikuperimi i plotë dhe përshtatja me ngarkesat e stërvitjes, ndërsa vendimi për aktivizimin në ndeshje do të merret në ditët në vijim.