Luka Modriç, edhe në moshën 40-vjeçare, vazhdon të luajë me intensitet të lartë falë një programi të veçantë përgatitjeje fizike. Ky program është zhvilluar nga përgatitësi kroat Vlatko Vučetić dhe bazohet në metodën e “micro-dosing”, që përfshin doza të vogla ushtrimesh të shpërndara gjatë ditës. Shumica e këtyre ushtrimeve kryhen me shirita elastikë, të cilët ndihmojnë në rritjen e forcës, elasticitetit dhe parandalimin e dëmtimeve. Kjo rutinë e përditshme ka mundësuar që Modriç të vazhdojë karrierën në nivelet më të larta edhe pas moshës 40 vjeç.