Selektori i Sllovakisë, Francesco Calzona, ka deklaruar se kapiteni Milan Skriniar po përpiqet të luajë në ndeshjen gjysmëfinale të play-off-it për Kupën e Botës kundër Kosovës, pavarësisht një dëmtimi serioz në ijë që e ka mbajtur jashtë fushës që nga 19 shkurti. Skriniar, i cili aktivizohet te Fenerbahçe dhe ka shënuar 2 gola në 35 ndeshje këtë sezon, po bën përpjekje maksimale për t’u rikthyer dhe për të ndihmuar skuadrën e tij në këtë përballje të rëndësishme. Calzona e ka vlerësuar Kosovën si një kundërshtar serioz dhe ka falënderuar publikisht Skriniarin dhe klubin e tij për përkushtimin ndaj kombëtares. Trajneri theksoi se mbrojtësi po rrezikon një pjesë të karrierës së tij për të qenë i gatshëm në këto ndeshje vendimtare, duke shpresuar që ai të mund të luajë në të dy ndeshjet e ardhshme.