Pak ditë para ndeshjes vendimtare të Grupit A në Kupën e Botës mes Meksikës dhe Koresë së Jugut, një incident i pazakontë ka tronditur ambientet e kampit stërvitor të ekipit aziatik. Një dron i dyshuar për spiunazh u shfaq mbi fushën stërvitore pranë Guadalaharës, duke shkaktuar ndërhyrjen e menjëhershme të ushtrisë meksikane, e cila rrëzoi pajisjen duke bllokuar sinjalin e saj. Dy persona të paidentifikuar që e drejtonin dronin arritën të largoheshin para se forcat e sigurisë të reagonin, ndërsa departamenti i video-analizës së Koresë së Jugut regjistroi arratisjen e tyre. Federata koreane i ka raportuar menjëherë incidentin FIFA-s, ndërsa policia meksikane ka nisur hetimet për të zbuluar rrethanat dhe qëllimet e këtij akti, që ka rritur tensionet para një ndeshjeje kyçe për kreun e grupit.