Kryetari i komunës së Drenasit, Ramiz Lladrovci, ka konfirmuar se Stadiumi Nacional i Futbollit do të ndërtohet në zonën kadastrale të Sankocit, një vend strategjik në zemër të Kosovës pranë autostradës “Ibrahim Rugova”. Projekti është përfshirë në buxhetin e Ministrisë së Kulturës, Rinisë dhe Sportit për vitet 2026-2028 me një fond total prej 15 milionë eurosh. Studimi i fizibilitetit, i kryer nga ekspertë ndërkombëtarë, ka vlerësuar këtë lokacion si më të përshtatshëm për nga hapësira, qasja dhe infrastruktura përreth. Lladrovci thekson se nuk do të lejohet ndryshimi i vendndodhjes së stadiumit dhe se do të ndiqen mekanizmat ligjorë për të mbrojtur këtë vendim, ndërsa ndërtimi i stadiumit shihet si një nevojë urgjente për sportistët dhe reputacionin e Kosovës.