Superliga e Kosovës në basketboll vazhdon këtë fundjavë me një derbi shumë të pritur ndërmjet nënkampionit Bashkimit dhe kampiones Trepçës, që aktualisht renditen në vendin e dytë dhe të parë në tabelë. Këto dy skuadra janë përballur edhe në dy finalet e fundit të Kupës, ku fituese ka dalë Trepça, e cila ka regjistruar një seri prej 15 fitoreve radhazi. Prizrenasit kanë 16 fitore dhe 7 humbje, ndërsa mitrovicasit 21 fitore dhe 3 humbje, duke e bërë këtë ndeshje shumë të rëndësishme para fazës së “Play-off”-it që pritet të jetë jashtëzakonisht konkurruese. Në të njëjtën ditë do të zhvillohet edhe ndeshja GO+ Peja – Bora, ku pejanët kanë 10 fitore dhe 13 humbje, kurse prishtinasit 12 fitore dhe 11 humbje, ndërsa kampionati po hyn në fazën finale ku çdo ndeshje është vendimtare për synimet e skuadrave.