Të shtunën në orën 20:00 zhvillohen të gjitha ndeshjet e xhiros së 19-të të Superligës së Kosovës në hendboll për meshkuj, me vëmendjen kryesore në palestrën “Bill Clinton” në Ferizaj, ku përballen Kastrioti dhe Llapi. Kastrioti renditet i dyti në tabelë me 32 pikë, po aq sa edhe lideri Rahoveci, ndërsa Llapi ndodhet në vendin e pestë me 15 pikë dhe synon të hyjë në plejof pas përforcimeve të fundit. Ferizajasit janë në seri prej katër fitoreve rresht, ndërsa Llapi ka shënuar tri fitore pas një barazimi me Vëllaznimin. Në ndeshjet e tjera, kampioni në fuqi Rahoveci pritet të dominojë ndaj Trepçës në “Mizahir Isma”, ndërsa Vëllaznimi dhe Besa Famgas konsiderohen favoritë në përballjet përkatëse ndaj Vushtrrisë dhe Prishtinës.