Tifogrupi “Dardanët” ka njoftuar se janë shitur të gjitha biletat për ndeshjen historike të Kosovës ndaj Sllovakisë, që do të zhvillohet më 26 mars në kuadër të plejofit për kualifikim në Botërorin 2026. Interesimi për këtë ndeshje ka qenë jashtëzakonisht i madh, dhe tani nuk ka më bileta në dispozicion për tribunat e tifozëve mysafirë. Federata e Futbollit e Kosovës ka marrë rreth 1100 bileta, ndërsa stadiumi në Bratislavë ka kapacitet prej 22,500 ulëseve, ku 5% e biletave janë dedikuar tifozëve kosovarë. Nëse Kosova fiton ndaj Sllovakisë, finalja e plejofit do të luhet më 31 mars në “Fadil Vokrri” kundër Turqisë ose Rumanisë. Tifogrupi “Dardanët” kërkon mirëkuptim nga tifozët pasi nuk do të pranohen më kërkesa për bileta, por regjistrimet për abonimet vjetore vazhdojnë për ndeshjet e ardhshme.