Klubi i futbollit Vushtrria është dënuar me dy ndeshje pa praninë e shikuesve dhe me gjobë prej 2,500 eurosh për organizim të dobët dhe sjellje të papërshtatshme të tifozëve gjatë ndeshjes kundër Dritës në Kampin Nacional të Hajvalisë. Gjatë takimit, tifozët mysafirë të Dritës “Intelektualët” dhe tifozët vendas “Forca” u përfshinë në sharje, ofendime dhe përleshje, duke shkaktuar ndërprerje të ndeshjes për rreth 13 minuta dhe dëmtime të infrastrukturës së fushës. Pas ndëshkimit me karton të kuq të një lojtari vendas, tifozët e Vushtrrisë hodhën shishe plastike në drejtim të gjyqtarit, ndërsa pas përfundimit të ndeshjes hynë në fushë dhe u përplasën me policinë, duke shkaktuar arrestimin e tre prej tyre. Përveç Vushtrrisë, edhe Drita është gjobitur me 1,000 euro për dëmtim të fushës nga hedhja e mjeteve piroteknike nga tifozët e saj. Ndërkaq, trajneri i Lirisë, Ismet Munishi, është ndëshkuar me një ndeshje mosushtrim të funksionit dhe vërejtje për sjellje të pahijshme ndaj zyrtarëve gjatë ndeshjes së ekipit të tij.