Klubi i basketbollit Trepça, kampion dhe fitues i Kupës së Kosovës, do të marrë pjesë në edicionin e ardhshëm të FIBA Europe Cup, duke hyrë direkt në fazën e grupeve pa kaluar përballjet kualifikuese. Ky vendim erdhi pasi palestra “Minatori” në Mitrovicë nuk i plotëson kushtet teknike për organizimin e ndeshjeve në Basketball Champions League, përfshirë edhe vijëzimin e fushës që është i papërshtatshëm. Për shkak se asnjë palestër në Kosovë nuk përmbush standardet e kërkuara, Trepça ka refuzuar të luajë ndeshjet si vendas jashtë vendit dhe larg tifozëve të saj. Klubi ka njoftuar se do të përqendrohet në garën e FIBA Europe Cup, duke shfrytëzuar mundësinë e rrallë për të konkurruar direkt në fazën e grupeve.