Bordi i Federatës së Basketbollit të Kosovës ka miratuar rikthimin e KB Vëllaznimit në Superligën e Kosovës për edicionin garues 2026/27, duke i dhënë klubit një “Wild Card”. Kjo vendimmarrje erdhi pas një periudhe kontestimesh dhe kundërshtimesh, pasi Vëllaznimi kishte rënë nga liga në xhiron e fundit, megjithëse kishte pikë të barabarta me Rahovecin dhe Sigal Prishtinën, për shkak të interpretimeve të paqarta të propozicioneve të garave. Klubi gjakovar kishte paralajmëruar ankesa në FBK, KAS dhe madje edhe padi në gjykatë, ndërsa Drita e Gjilanit, që kishte të drejtën për të garuar në Superligë, nuk plotësoi kushtet për licencim. Për shkak të boshllëkut në ligë, Bordi i FBK-së vendosi që vendi vakant të plotësohet nga Vëllaznimi, duke i dhënë kështu një mundësi të re për të qëndruar në elitën e basketbollit kosovar. Në të njëjtën mbledhje u miratuan edhe propozicionet e garave, kalendarët, fondet e shpërblimeve dhe modeli i mbështetjes financiare për klubet në edicionin e ardhshëm.