Vllaznia ka zyrtarizuar rinovimin e mesfushorit Klinti Qato për sezonin 2026-2027, duke ruajtur kështu boshtin e skuadrës për edicionin e ri. Qato, i vlerësuar shumë nga tifozët për grintën dhe përkushtimin në fushë, ka zhvilluar 36 ndeshje këtë sezon, me dy gola dhe një asist, duke qenë një prej lojtarëve kyç në formacionin e trajnerit Edi Martini. Klubi shkodran ka vazhduar me besimin ndaj kontingjentit ekzistues, duke rinovuar edhe portierin Pohls, si dhe disa lojtarë të tjerë, përveç trajnerit dhe drejtorit sportiv. Kjo strategji tregon se Vllaznia synon të ndërtojë mbi bazën e stabilitetit dhe përvojës për të përballuar sfidat e sezonit të ardhshëm.