Vllaznia do të përballet sonte me Partizanin në një ndeshje të vlefshme për javën e tretë të Abissnet Superiores, e cila do të nisë në orën 18:30 në stadiumin “Loro Boriçi”. Ekipi shkodran do të luajë pa trajnerin Edi Martini, i pezulluar për shkak të një gjesti në ndeshjen e fundit, ndërsa presidenti Alban Xhaferi nuk do të jetë i pranishëm në stadium për shkak të pezullimit me 15 ndeshje. Pas dy golave të anuluar me VAR në ndeshjen e fundit në Elbasan, ku Vllaznia mori vetëm një pikë, tifozët kanë treguar interes të madh për të mbështetur ekipin në këtë sfidë të rëndësishme. Klubi ka bërë një thirrje të fortë për tifozerinë, duke kërkuar që “Loro Boriçi” të flasë me zë dhe zemër për të ndihmuar skuadrën në përpjekjen për të thyer tabunë e humbjeve ndaj Partizanit që prej vitit 2022 dhe për të ngjitur në renditje.