Vushtrria është shpallur kampione e Ligës së Parë dhe pas gjashtë vitesh rikthehet në elitën e futbollit kosovar. Në një ndeshje vendimtare në Gjakovë, mysafirët fituan 3:1 ndaj rivalit të drejtpërdrejtë, Vëllaznimit, duke përmbysur disavantazhin prej 0-1. Dardan Jashari shënoi i pari për Vëllaznimin në minutën e 13-të, por Urim Statovci u bë protagonist me dy gola, përfshirë një penallti të fituar pas rishikimit VAR, ndërsa Erjon Krasniqi vulosi rezultatin në minutën e 81-të. Me këtë fitore, Vushtrria përfundoi kampionatin me 75 pikë, duke lënë pas Feronikelin dhe duke siguruar ngjitjen në Superligë, ndërsa Vëllaznimi mbetet jashtë elitës dhe barazhit.