Ish-mesfushori i njohur Wesley Sneijder ka befasuar të gjithë duke u rikthyer në fushën e futbollit në moshën 41-vjeçare. Ai debutoi me skuadrën amatore OSM ’75 Maarssen, që garon në divizionin e nëntë të futbollit holandez, duke luajtur rreth 20 minuta në ndeshjen e fundit. Vendimi për t’u rikthyer nuk ishte rastësi, pasi ky klub ka lidhje familjare me të; vëllai i tij Rodney është lojtar, ndërsa vëllai tjetër Jeffrey është pjesë e stafit teknik. Sneijder theksoi se dëshira për të luajtur futboll nuk ka ikur kurrë dhe se futbolli mbetet loja më e bukur, duke shtuar se nëse ende mund të luajë, pse të mos e bëjë. Ai kishte njoftuar tërheqjen nga futbolli profesionist në vitin 2019, por rikthimi në nivel amator ka ngjallur nostalgji dhe habi te tifozët.