Futbollistit ganez Thomas Partey i është refuzuar viza për të hyrë në Kanada, duke e detyruar të humbasë ndeshjen e parë të Ganës në Kupën e Botës kundër Panamasë më 18 qershor. Ky vendim i qeverisë kanadeze lidhet me akuza të rënda për përdhunim dhe sulm seksual që rëndojnë mbi 32-vjeçarin, të cilat ai i ka mohuar. FIFA ka konfirmuar se vendimi për hyrjen në vend është në dorë të autoriteteve kanadeze dhe ka bërë të ditur se Partey nuk do të jetë në dispozicion për ndeshjen hapëse. Megjithatë, ai mund t’i bashkohet kombëtares së Ganës për ndeshjet e tjera të grupit që zhvillohen në Shtetet e Bashkuara, ndërsa çështja gjyqësore pritet të shqyrtohet në vitin 2027.