Bosnja-Hercegovina u kualifikua për herë të dytë në histori në Kampionatin Botëror, duke eliminuar Italinë në penallti në ndeshjen e zhvilluar në Zenicë. Sulmuesi boshnjak i Stuttgartit, Ermedin Demiroviq, i cili premtoi para ndeshjeve të plejofit se do t’u blinte birra tifozëve në stadiumin e klubit nëse Bosnja kualifikohej, tani po përmbush këtë premtim. Ai do të paguajë rreth 300 mijë euro për birra, duke mbuluar 60 mijë tifozët e stadiumit të Stuttgartit, ku një birrë kushton rreth 5 euro. Demiroviq konfirmoi se do ta mbajë premtimin me kënaqësi, pavarësisht kostos së lartë, ndërsa ndeshja e ardhshme e Stuttgartit në shtëpi do të luhet këtë të shtunë kundër Borussia Dortmundit.