Golden Eagle Ylli ka fituar bindshëm ndaj Pejës me rezultat 81:62 në derbin e xhiros së 23-të të Superligës së Kosovës në basketboll, i zhvilluar të dielën mbrëma në Suharekë. Kjo ishte humbja e katërt rresht për Pejën, ndërsa Ylli regjistroi fitoren e dytë radhazi dhe vazhdon formën pozitive. Ndeshja ishte e barabartë në çerekun e parë, por Ylli krijoi epërsi të rehatshme në pjesën e dytë të takimit dhe e ruajti avantazhin deri në fund. Scott Bamforth ishte më i dalluari te Ylli me 24 pikë, 6 asistime dhe 4 kërcime, ndërsa te Peja spikati Cesare Edwards me 10 pikë dhe 12 kërcime. Pas kësaj fitoreje, të dy skuadrat janë barazuar me nga 33 pikë dhe renditen në vendet katër dhe pesë në tabelën e Superligës.