Kombëtarja e Kosovës u mposht në shtëpi me rezultatin 1-0 nga Turqia në finale të playoff-it për kualifikim në Kupën e Botës 2026, falë golit të Kerem Akturkoglu në minutën e 53-të. Kenan Yildiz, ylli i Juventusit, luajti nga minuta e parë dhe u zëvendësua në minutën e 89-të, ndërsa bashkëlojtarit të tij te Juventusi, Edon Zhegrova, i’u dha mundësia të luajë vetëm në pjesën e dytë, duke u inkuadruar në minutën e 71-të. Pas përfundimit të ndeshjes dhe festës së futbollistëve turq, Yildiz bëri një gjest të veçantë duke vrapuar për të përqafuar dhe ngushëlluar Zhegrovën për eliminimin e Kosovës. Të dy lojtarët do të rikthehen në fushë së bashku në ndeshjen e Juventusit kundër Genoas në “Allianz Stadium” të hënën e ardhshme.