Legjenda franceze Zinedine Zidane ka arritur një marrëveshje verbale për të marrë drejtimin e ekipit kombëtar të Francës pas përfundimit të Kupës së Botës 2026, duke pasuar Didier Deschamps, i cili ka njoftuar largimin e tij. Lajmin e konfirmoi gazetari i njohur Fabrizio Romano, i cili thekson se marrëveshja është praktikisht përfundimtare, ndërsa Shoqata Franceze e Futbollit ende nuk e ka bërë njoftimin zyrtar. Zidane nuk ka qenë trajner që nga largimi i tij nga Real Madrid në vitin 2021, por emri i tij ka qenë i lidhur me stolin e Francës për vite me radhë. Si lojtar, ai fitoi Kupën e Botës 1998 dhe Kampionatin Evropian 2000, ndërsa si trajner i Real Madridit arriti suksese të mëdha, përfshirë tri fitore radhazi në Ligën e Kampionëve dhe dy tituj të La Liga.