Autoriteti i Mediave Audiovizive (AMA) ka ndërmarrë një tjetër veprim kundër piraterisë online duke bërë të paarritshme platformën “shqiperia.dev”, e cila transmetonte pa autorizim përmbajtje të operatorëve të licencuar në Shqipëri si DigitAlb dhe Tring. Lajmi u bë i ditur nga drejtoresha e AMA-s, Armela Krasniqi, e cila njoftoi se platforma u raportua zyrtarisht për shkelje të të drejtave të transmetimit. Falë bashkëpunimit me kompaninë Cloudflare, u identifikuan dhe u bllokuan ofruesit e shërbimit të hostimit që mbështesnin funksionimin e faqes, duke bërë që ajo të mos jetë më e aksesueshme. AMA thekson se do të vazhdojë monitorimin dhe raportimin e çdo platforme të dyshuar për pirateri, në mbrojtje të operatorëve të licencuar dhe të drejtave mbi produktin audioviziv.