Komuna e Gjilanit ka nisur zbatimin e iniciativës WiFi4WB, e cila ofron internet falas në vendet më të frekuentuara të qytetit. Në ceremoninë e nënshkrimit të Memorandumit të Mirëkuptimit morën pjesë kryetari i komunës, Alban Hyseni, drejtori gjeneral i GIZ-it për Kosovë dhe Maqedoninë e Veriut, David Oberhuber, dhe përfaqësuesi i Bashkimit Evropian në Kosovë, Boguslaw Gertruda. Pas nënshkrimit, u bë edhe vizita në sheshin e qytetit ku është instaluar rrjeti WiFi4WB, duke shënuar një hap të rëndësishëm drejt digjitalizimit të hapësirave publike. Kryetari Hyseni theksoi se ky projekt do të mundësojë qasje më të lehtë në informacion dhe shërbime digjitale për të rinjtë, studentët, bizneset dhe qytetarët, duke përmirësuar jetën e komunitetit.