Një studim i Universitetit Stanford ka arritur të përkthejë sinjalet nervore të një gruaje 52-vjeçare, e paralizuar prej 19 vitesh, në fjalë të kuptueshme përmes një matrice elektrodash të implantuar në trurin e saj. Teknologjia, e mbështetur nga algoritme të inteligjencës artificiale, deshifron sinjalet e neuroneve ndërsa pacientët imagjinojnë të flasin, duke i shndërruar ato në tekst në kohë reale. Përparimet e fundit përfshijnë edhe deshifrimin e “të folurit të brendshëm” me një saktësi deri në 74%, si dhe rikrijimin e imazheve dhe muzikës nga aktiviteti truror përmes skanimeve dhe algoritmeve gjeneruese. Megjithëse teknologjia ende ka kufizime dhe ngrit çështje etike për privatësinë mendore, ajo përfaqëson një hap historik për pacientët me aftësi të kufizuara dhe hap rrugën për përdorime klinike dhe komerciale në të ardhmen.