Kompania Phia, e themeluar nga Phoebe Gates, vajza e Bill Gates, është përfshirë në një skandal lidhur me përdorimin e praktikave të ndaluara në marketingun digjital, konkretisht "cookie stuffing". Sipas një hetimi të Bloomberg, aplikacioni i Phia kishte shtuar fshehurazi kode që ridrejtuan komisionet e shitjeve online në llogarinë e saj, duke shkelur rregullat e shumicës së platformave të shitjeve. Përfaqësuesit e kompanisë kanë deklaruar se bëhej fjalë për një gabim në kod, i cili tashmë është korrigjuar, ndërsa Phoebe Gates thekson se dëshiron të arrijë sukses vetëm me meritë personale. Pavarësisht skandalit, Phia po shënon rritje të madhe dhe ka siguruar mbi 37 milionë euro investime, duke u vlerësuar në rreth 159 milionë euro.