Kosova do të përfaqësohet nga ekipi i UBT-së në FIRST Global Challenge 2026, një garë prestigjioze ndërkombëtare në fushën e robotikës, që mbahet këtë vit në Incheon, Kore e Jugut. Gara zhvillohet nga 7 deri më 10 tetor dhe ka temën “Igniting Innovation”, duke sfiduar ekipet të krijojnë zgjidhje për problemin e zjarreve të egra dhe ndikimin e tyre në mjedis, biodiversitet dhe komunitete. Ekipi kosovar përbëhet nga gjashtë nxënës të talentuar dhe udhëhiqet nga mentorët Elita dhe Leona Hajrizi, të cilët bashkëpunojnë ngushtë me stafin e Mekatronikës në UBT për përgatitjet teknike dhe strategjike. Pas suksesit në edicionin e kaluar në Panama, ku mentorja Elita Hajrizi u shpall “Best Mentor”, pritshmëritë për paraqitjen e ekipit në Korenë e Jugut janë të larta, duke promovuar potencialin e të rinjve kosovarë në shkencë, teknologji dhe inovacion.