Ministri i Transformimit Digjital, Stefan Andonovski, njoftoi se Maqedonia po planifikon ndërtimin e një qendre kombëtare të të dhënave, e cila do të shërbejë si baza kryesore për renë qeveritare, sigurinë kibernetike dhe zhvillimin e inteligjencës artificiale. Projekti ka kaluar fazën e studimit të fizibilitetit dhe po punohet për sigurimin e lokacionit dhe modelit financiar. Qendra nuk do të jetë thjesht një objekt për vendosjen e serverëve, por një infrastrukturë kyçe shtetërore që do të lidhë institucionet dhe do të ofrojë shërbime digjitale me nivel të lartë sigurie dhe efikasitet energjetik. Ky investim pritet të mbështesë zhvillimin digjital të vendit për 20-30 vitet e ardhshme, duke konsoliduar kapacitetet dhe rritur sigurinë e të dhënave shtetërore.