Komuna e Obiliqit ka hapur një tender prej 45 mijë eurosh për zhvillimin e platformës digjitale “Alo Komuna”, e cila synon të digjitalizojë menaxhimin e ankesave dhe kërkesave të qytetarëve. Projekti përfshin krijimin e një web aplikacioni për administratën komunale dhe katër aplikacione mobile për sistemet iOS dhe Android, që do të mundësojnë komunikim të drejtpërdrejtë mes qytetarëve dhe institucioneve komunale. Përmes këtij sistemi, çdo ankesë do të dërgohet automatikisht te drejtoria përkatëse dhe do të monitorohet në kohë reale nga stafi i autorizuar, duke rritur transparencën dhe përgjegjshmërinë në trajtimin e kërkesave. Komuna e Obiliqit e sheh këtë platformë si një hap të rëndësishëm drejt modernizimit të shërbimeve dhe përmirësimit të komunikimit me banorët.