Policia e Kosovës ka përfunduar me sukses një trajnim 15-ditor për operimin e dronëve të tipit Skydio, ku 12 zyrtarë policorë u certifikuan për përdorim profesional dhe të sigurt të këtyre sistemeve ajrore pa pilot. Trajnimi përfshiu njohuri teorike dhe praktike mbi operimin, menaxhimin, planifikimin e misioneve fluturuese dhe përdorimin e sistemeve inteligjente të navigimit. Në kuadër të këtij avancimi, Policia ka pranuar një donacion prej mbi 273 mijë dollarësh nga Ambasada e SHBA-së në Kosovë, përmes programit Anti-Terrorism Assistance Program (ATA), që do të forcojë kapacitetet operative dhe teknologjike të njësive policore. Ky bashkëpunim dhe mbështetje ndërkombëtare pritet të rrisë efikasitetin dhe sigurinë publike në vend, ndërsa Policia shprehu mirënjohje për të gjithë partnerët institucionalë dhe instruktorët e përfshirë.