Inteligjenca artificiale po përmirëson jetën tonë, por njëkohësisht rrit edhe kërcënimet për privatësinë e qytetarëve. Algoritmet mund të mbledhin dhe analizojnë të dhëna personale brenda sekondash, duke e bërë vjedhjen e identitetit më të lehtë se kurrë më parë. Krenare Sogojeva Dermaku, komisionare e Agjencisë për Informim dhe Privatësi në Kosovë, thekson se problemi nuk është AI-ja vetë, por mënyra se si njerëzit e përdorin atë dhe sa informacion ndajnë pa e kuptuar rrezikun. Ajo paralajmëron që çdo informacion i dhënë chatbot-ëve apo platformave të tjera mbetet në sistemet e tyre, duke e bërë të domosdoshme një përdorim të kujdesshëm dhe informim të vazhdueshëm për mbrojtjen e të dhënave personale.