Një studim i Klubit Amerikan të Automobilave (AAA) ka zbuluar se temperaturat ekstreme ndikojnë ndjeshëm në autonominë e veturave elektrike. I ftohti ekstrem, veçanërisht kur temperatura bie rreth shtatë gradë nën zero, ul autonominë deri në 39 për qind për shkak të ngadalësimit të proceseve kimike të baterisë dhe konsumit të lartë të energjisë për ngrohjen e kabinës. Nxehtësia e verës ka një efekt më të vogël, duke ulur autonominë vetëm rreth 8.5 për qind për shkak të përdorimit të klimës. Veturat që përdorin pompë termike arrijnë të ruajnë më mirë energjinë, duke siguruar 10–20 për qind më shumë autonomi në dimër krahasuar me ato pa këtë teknologji.