Ministri i Shëndetësisë, Azir Aliu, njoftoi se telemjekësia do të jetë një nga shtyllat kryesore për përmirësimin e sistemit shëndetësor dhe për adresimin e mungesës së mjekëve në Maqedoninë e Veriut. Projekti ka filluar me pilotimin në dy qytete, Dibër dhe Delçevë, ku shërbimet ofrohen nga distanca nga Shkupi, ndërsa në fazat e ardhshme pritet standardizimi dhe zgjerimi i sistemit përfshirë mjekët nga diaspora. Aliu theksoi se shumë specialistë në diasporë janë të gatshëm të kontribuojnë, madje edhe pa kompensim, duke sjellë ekspertizë të lartë në vend. Në fazën e tretë do të zhvillohen sisteme dixhitale për analiza të avancuara, veçanërisht në radiologji, që do të mundësojnë mjekëve jashtë vendit të japin mendime profesionale për rastet në institucionet shëndetësore lokale.