Ministri i Shëndetësisë, Azir Aliu, mori pjesë në takimin e nivelit të lartë të Nismës për Vendet e Vogla të OBSH-së në Riga, ku u diskutua roli i vendeve të vogla në krijimin e zgjidhjeve digjitale për sistemet shëndetësore. Ai theksoi se, megjithë burimet e kufizuara, këto vende kanë avantazhe si përshtatshmëria e shpejtë dhe koordinimi i mirë politik për të ndërtuar sisteme më efikase dhe të qëndrueshme. Aliu prezantoi Strategjinë Kombëtare për Shëndetësi Digjitale 2026–2030, duke e përshkruar digjitalizimin si një mjet për përmirësimin e kujdesit ndaj pacientit dhe zvogëlimin e barrës administrative për punonjësit shëndetësorë. Në fokus ishin edhe projektet konkrete si teledermatologjia për zonat rurale dhe zhvillimi i ekipeve multidisiplinare që lidhin nivelet e ndryshme të kujdesit shëndetësor.