Sulmet kibernetike të fundit ndaj institucioneve të Kosovës janë paralajmërim për sulme më të mëdha që mund të targetojnë infrastrukturën kritike si energjia, uji dhe telekomunikacioni. Arben Fetoshi, drejtori i Institutit “Octopus”, thekson se këto sulme, shpesh të kombinuara me operacione hibride, kanë për qëllim destabilizimin e vendit dhe janë pjesë e strategjisë së koordinuar të Serbisë dhe Rusisë. Përveç paralizimit të faqeve të internetit, sulmet synojnë mbledhjen e informacionit, spiunazhin, manipulimin e të dhënave dhe krijimin e panikut në mesin e qytetarëve. Fetoshi nënvizon nevojën për rritjen e kapaciteteve profesionale dhe bashkëpunimin më të ngushtë me SHBA-në dhe BE-në për të mbrojtur hapësirën kibernetike dhe infrastrukturën kritike të Kosovës.