Një sulm kibernetik i kryer nga hakerë iranianë goditi sistemin e Postës Shqiptare, por shërbimet e institucionit vazhdojnë të funksionojnë normalisht. Ministri i Shtetit për Qeverisjen Vendore, Ervin Demo, deklaroi pas mbledhjes së qeverisë se po zhvillohet një analizë e detajuar nga AKSHI dhe ekspertët e Postës Shqiptare për të vlerësuar situatën. Aktualisht nuk ka të dhëna që tregojnë se informacionet janë inkriptuar apo të paaksesueshme, por pritet përfundimi i analizave për të konfirmuar këtë. Demo theksoi gjithashtu se autoriteti i luftës kibernetike ka kapacitete të avancuara për të garantuar integritetin e të dhënave publike në institucionet shqiptare.