Njëqind nxënës nga komuna të ndryshme të Kosovës janë përzgjedhur për të përfituar bursa shkollimi në UBT International Smart Schools, pas suksesit në Testin Provues të Arritshmërisë. Këto bursa u mundësojnë atyre të ndjekin arsimin në një ambient modern dhe inovativ, duke zhvilluar njohuri dhe aftësi të rëndësishme për të ardhmen akademike dhe profesionale. Prof. Dr. Edmond Hajrizi, themelues dhe rektor i UBT-së, theksoi se kjo nismë dëshmon përkushtimin e institucionit për të mbështetur talentet e rinj dhe për t’i përgatitur ata për tregun e punës që kërkon teknologji, inovacion dhe aftësi digjitale. Përfituesit kanë zgjedhur drejtimet që lidhen me fushat më kërkuese të së ardhmes, duke u përgatitur për sfidat e reja në shkencë, shëndetësi dhe teknologji.