Një gjeneratë e re prej 80 asistentësh të arsimit është diplomuar në Kosovë në kuadër të programeve të Qendrës Profesionale për Gjithëpërfshirje, me mbështetjen e partnerit britanik OSIE London. Të diplomuarit do të angazhohen në mbështetjen profesionale të nxënësve me nevoja të veçanta në shkollat e vendit, duke kontribuar në forcimin e arsimit gjithëpërfshirës dhe krijimin e mundësive të barabarta për të gjithë fëmijët. Psikologia Natyra Agani theksoi rëndësinë e këtij kualifikimi ndërkombëtar, i cili ofron ekspertizë dhe etikë profesionale në punën me këta nxënës. Ministri në detyrë i Arsimit, Hajrullah Çeku, vlerësoi këtë diplomim si një hap konkret për avancimin e sistemit arsimor dhe përfshirjen e nxënësve me nevoja të veçanta në Kosovë.