Agjencia për Ushqim dhe Veterinari (AUV) i bën thirrje pronarëve të qenve që të respektojnë ligjin duke vendosur mikroçip kafshëve të tyre shtëpiake dhe duke i regjistruar në modulin për kafshët shtëpiake në Sistemin Informativ të Agjencisë. Mikroçipimi është një procedurë që bëhet një herë dhe shërben për identifikimin e përhershëm të kafshës, duke ndihmuar në përcaktimin e pronësisë, kujdesin shëndetësor dhe parandalimin e transmetimit të sëmundjeve ngjitëse. Pas regjistrimit, pronarët marrin edhe pasaportën e kafshës, ndërsa kanë detyrimin ligjor të njoftojnë çdo ndryshim të të dhënave ose ngjarje si vdekja, humbja apo shitja e kafshës. AUV thekson se mikroçipimi ndihmon gjithashtu në parandalimin e braktisjes, kontrollin e shumimit dhe lehtësimin e gjetjes së kafshëve në rast humbjeje apo vjedhjeje.