Bunarfest 2026, që organizohet për herë të 22-të në Prizren, ka nisur këtë vit me një aksion të gjerë për pastrimin e mjedisit në lumin Lumbardh dhe zonat përreth. Rreth 60 aktivistë vendorë dhe ndërkombëtarë morën pjesë në pastrimin e shtratit të lumit, grumbullimin e mbeturinave dhe krasitjen e drunjve, me qëllim rritjen e vetëdijes për mbrojtjen e natyrës dhe krijimin e një ambienti më të pastër para aktiviteteve kryesore të festivalit. Zëvendësministrja në detyrë e Kulturës, Rinisë dhe Turizmit, Nora Arapi Krasniqi, theksoi rëndësinë e këtij aksioni dhe rritjen e interesit për Bunarfestin, duke njoftuar se garat e raftingut do të zhvillohen të dielën me pjesëmarrjen e sportistëve nga Kosova dhe vende të tjera. Programi i festivalit përfshin gjithashtu aktivitete muzikore në Autostrada Hangar, performanca DJ-sh dhe ceremoninë e ndarjes së çmimeve, duke mbledhur çdo vit një numër të madh vizitorësh vendas dhe të huaj.