Kompania Rajonale e Ujësjellësit “Mitrovica” ka paralajmëruar qytetarët të mos hedhin mbeturina në rrjetin e kanalizimit, duke theksuar se kjo sjell bllokime të shpeshta dhe dëmtime të infrastrukturës. Ekipet e mirëmbajtjes po përballen me materiale të ndryshme si tekstile, peceta higjienike, gurë dhe materiale inerte, të cilat nuk duhet të përfundojnë në sistemin e ujërave të zeza. Kjo sjellje jo vetëm që shkakton tejmbushje dhe shqetësime për komunitetin, por rrit edhe kostot e mirëmbajtjes së rrjetit. KRU “Mitrovica” apelon për përgjegjshmëri nga qytetarët, duke theksuar se një veprim i vogël i secilit mund të sigurojë një shërbim më të mirë dhe funksional për të gjithë.