Komuna e Mitrovicës ka tërhequr vëmendjen e qytetarëve pasi në njoftimin e saj institucional për vizitën e nënkryetarit Enis Osmani dhe drejtoreshës së Shëndetësisë, Albina Kastrati Rama, në Qendrën Kryesore të Mjekësisë Familjare, ishte përfshirë gabimisht një tekst udhëzues i gjeneruar nga inteligjenca artificiale. Në versionin fillestar të postimit në faqen zyrtare të komunës, para lajmit ishte shfaqur fraza “Ja një version i lajmit në stil institucional”, e cila përdoret zakonisht nga platformat si ChatGPT gjatë krijimit të teksteve. Pas reagimeve në rrjetet sociale dhe vërejtjeve të publikut, njoftimi u korrigjua dhe u ripublikua duke hequr tekstin e panevojshëm dhe duke lënë vetëm përmbajtjen institucionale. Ky incident nxjerr në pah përdorimin e inteligjencës artificiale në komunikimin zyrtar dhe sfidat që mund të sjellë në publikimin e informacionit.