Në 16 shkolla të Prishtinës ka nisur zyrtarisht zbatimi i mësimit tërëditor, ku katër prej tyre po e aplikojnë këtë model për herë të parë. Një dokument që kërkon nga prindërit të deklarojnë paraprakisht nëse fëmijët e tyre do të qëndrojnë pas orarit të rregullt ka ngritur shumë dilema dhe diskutime mbi detyrueshmërinë e këtij modeli. Drejtoresha e shkollës “Faik Konica” sqaron se deklarimi është kërkesë e prindërve për aktivitetet jashtashkollore dhe nuk cenon konceptin e mësimit tërëditor, ndërsa drejtori i arsimit në Prishtinë kërkon rishikimin e formularit dhe thekson se largimi i nxënësve duhet të bëhet gjatë procesit mësimor. Përveç kësaj, mungesa e ditarëve mbetet një sfidë tjetër për arsimin në kryeqytet, me shpërndarjen e tyre që pritet të realizohet së shpejti.