Sot në Kosovë afro 5 mijë maturantë do t’i nënshtrohen Provimit të Maturës, i cili fillon në orën 10:00 dhe zhvillohet në 55 qendra testimi në gjithë vendin. Ministria e Arsimit dhe Shkencës ka bërë të ditur se nga 5,033 aplikime të marra përmes platformës eKosova, janë aprovuar 4,967 kandidatë për të marrë pjesë në provim. Për të garantuar një proces të rregullt dhe të sigurt, të gjithë komisionarët dhe administruesit duhet të jenë në qendrat e testimit një orë para fillimit, ndërsa maturantët duhet të paraqiten me dokumentin e identifikimit në qendrën e përcaktuar. Ministria ka theksuar rëndësinë e respektimit të rregullave dhe udhëzimeve për administrimin e provimit, duke siguruar barazi dhe transparencë për të gjithë kandidatët.