Në kuadër të kujdesit parësor shëndetësor, Qendrat e Mjekësive Familjare do të ofrojnë së shpejti shërbime të reja për fëmijët, duke përfshirë psikologun, logopedin, punëtorin social dhe fizioterapeutin. Këto shërbime, të cilat më parë mungonin në sektorin publik dhe detyronin prindërit të paguanin shuma të mëdha në sektorin privat, do të jenë pjesë e programit për kujdesin ndaj grave shtatzëna, nënave lehona dhe fëmijëve 0-3 vjeç. Drejtoria e Shëndetësisë në Prishtinë njofton se procedurat e rekrutimit për këto profile janë në fazën fillestare dhe do të vazhdojnë në javët në vijim. Ndërkohë, disa komuna ende nuk kanë dhënë përgjigje në lidhje me nisjen e këtyre shërbimeve në nivel lokal.